El üchün yaralghan erbap
![](https://izlirimiz.org/wp-content/uploads/2019/11/IMG_6984-25-11-19-12-17.jpg)
Shemshidin Ayupow
© «Uyghur awazi»
Ötken heptide Almuta shehiridiki M.Yaqupow namidiki 101-mektep-gimnaziyaning Mejlisler zalida tilshunas alim, filologiya penlirining doktori, proféssor, Qazaqstan Jumhuriyiti Milliy penler akadémiyasining akadémigi, Qazaq SSRning xizmet körsetken pen erbabi, shundaqla duniyadiki birdin-bir Uyghurshunasliq institutini teshkil qilghuchi hem uning birinchi mudiri bolghan, Qazaqstan Jumhuriyitining «Altun kitawigha» ismi yézilghan jemiyet erbabi Ghojexmet Sedwaqasowning tughulghinining 90 jillighigha béghishlanghan xatire kech bolup ötti.
Riyasetchiler – Abduqéyim Imirow we Méhray Mexsimowa akadémikning ömürbayanigha qisqiche toxtilip ötkendin kéyin, gimnaziya oqughuchiliri teripidin yadqa oqulghan Ghojexmet Sedwaqasowning shéirliri we uninggha béghishlinip yézilghan misralar, shundaqla emgek yolidin élinip teyyarlanghan sehnilik körünüsh bilen Q.Ghojamiyarow namidiki dölet akadémiyalik Uyghur muzikiliq-komédiya téatrining naxshichisi Furqet Zayirowning ijra qilishidiki naxshilar we 101-mektep-gimnaziyaning «Dilraba» ussulchilar ansamblining orunlishidiki ussullar köpchilikning güldiras alqishigha sazawer boldi. Jirik alimning emgek yoli ekis étilgen widéorolik xatire kechning téximu tesirlik ötüshige zemin yaritip, köpchilik el üchün yaralghan oghlanning yarqin qiyapitini eske aldi.
Ghojexmet Sedwaqasow dégende, bizning köz aldimizgha –uyghurshunasliq peni, milliy maarip, metbuat, sen’et, milliy medeniyitimiz kélidu, — dédi deslepkilerdin bolup söz alghan «AtamUra» korporaSiyasi Uyghur rédakSiyasining bashlighi, «Ijatkar» jurnalining bash muherriri Malik Mehemdinow ustazi hem jutdishini yad étip. — Ghojexmet Sedwaqasow uyghur edebiy tilining shekillinishige, tereqqiy étishi we bügünki derijige yétishige bébaha töhpe qoshti. U intayin kemtar hem jutdashlirigha bolghan muhebbiti cheksiz insan édi.
Andin natiq büyük alimning wapatidin kéyin 7 tomluq eserini neshirdin chiqarghan uning ömürlük jüpti Omaq ana Hasanowaning bébaha emgigige bash égip, qeyser anigha mustehkem salametlik tilidi.
Xelqining teghdiri, yash ewlatning kélechigi üchün emgek qilip ötken akadémik toghriliq eslimiliri bilen bölüshkenler qatarida 101-mektep-gimnaziyaning mudiri Xurshidem Niyazowa, péshqedem jurnalist Abdukérim Tudiyarow, körneklik shair Abdughopur Qutluq, JUÉMning Almuta sheherlik shöbisi reisining orunbasari méSénat Dolquntay Abduxélil, Sultanqorghan mehellisining bash jigitbéshi Gheyret Memeteliéw boldi. Almuta sheherlik Uyghur étnomedeniyet merkizining reisi Hosmanjan Obulow pütkül hayatini uyghurshunasliq penige béghishlighan alimning ismini tilgha élip, uni yashlargha ülge qilip körsetti. Shundaqla alimning repiqisi Omaq Hasanowagha özi rehberlik qiliwatqan teshkilatning tewelludluq médalini tapshurdi.
Xulase söz akadémikning repiqisi Omaq Hasanowagha bérildi. Nuraniy ana öz sözide Qazaqstan ilim-penining tereqqiyati we millitimizning hertereplime riwajlinishi üchün ayanmay ter töküp, keynidin ölmes ghezne, tügimes miras qaldurghan büyük namayende Ghojexmet Sedwaqasowning hayatida öz menpiyiti üchün emes, xelqining teghdiri, yash ewlatning kélechigi üchün emgek qilip ötken erbap ékenligini qeyt qilghach, ushbu xatire kechke ishtraq qilghuchilargha hem ushbu chare-tedbirni uyushturushqa köp küch chiqarghan 101-mektep gimnaziyaning kolléktiwigha we uni qollap-quwetligen Almuta sheherlik Uyghur étnomedeniyet merkizige minnetdarlighini bildürdi.