Tughulghan kun mubarek Waqqas aka!!!

Elge tonulghan insan

© https://uyguravazi.kazgazeta.kz/news/52250

Aznat TALIPOW,

«Uiğur avazi»

Prézidéntimiz Qasim-Zhomart Toqaéwning Permani bilen 2025-zhil «Ishchi mutexessisler zhili» dep jakalandi. Dölet rehbirining éytishiche, adil we shijaetlik emgigi bilen utuqqa yetken ademler herqachan inawetlik, hörmetlik bolushi lazim. «Bir söz bilen éytqanda, jemiyitimizde emgekchanliq, kespiylik oxshash xisletler nahayiti zhuquri bahalinishi kérek. Öz kespini yétük égiligen mutexessisler millet sapasini ashuridu. Shunglashqa biz emgek adimining mertiwisini kötiriwatimiz» déyilgen Dölet rehbirining mektübide.

Rastini éytish kérek, kéyinki zhillarda yéngi ewlat wekilliride japa tartmay, köp pul tépishni arman qilidighan sewiye qélipliship qaldi. Qolidin kélidighan ishini yaxshi körüsh, uni sapaliq ishlesh, öz kespining mahiri bolushtin köre, «pul tapidighan orunni» égilesh arzusi üstün keldi. Parixorluq eng köp bayqilidighan sahalarda neq shu arman bilen ishqa orunlashqanlar hem yénik yol bilen jan béqish ghémide zhürgenler jemiyitimizning tereqqiyatida selbiy rol oynidi.

Heqiqitini éytqanda, Prézidéntimiz éytqandek, ishning yamini yoq, herqandaq emgek qedirlik. Eng muhimi, herkim jawapkerlikni chongqur chüshinip, öz wezipisini sapaliq atqurushqa tégish. Shu chaghdila élimiz tereqqiyatning daghdam yoligha chüshidu.

Endi öz kespini chin qelbidin söygen, zimmisige zhüklengen wezipining höddisidin zhuquri jawapkerlik bilen chiqqan chong ewlat wekilliri hélimu arimizda. Öz dewride nemunilik emgigi bilen abroy-inawet tapqan insanlarning hayat tejribisimu hazirqi yashlirimizgha ülge-ibret bolup qalidu.

Waqqas Abbasoghli Memedinow. Bu isim uyghur jamaetchiligige yaxshi tonush. Uning hayat yoligha nezer salidékenmiz, turmushtiki éghirchiliqlarni adil méhniti arqiliq yéngishni bilgen emgek adimining ömür musapisini körimiz. Aile sharaitigha bola, 16 yéshidila Almuta éghir mashina yasash zawodigha (AZTM) ishqa orunlashti. Emgek paaliyitini stanok aldida frézérowщik bolup bashlidi. Jismaniy ishta chiniqqini we kichigidin sportqa hewes qilghini sewep boldimu, uninggha Kéngesh armiyasining alahide yönilishi hésaplinidighan Hawa désanti qoshunida xizmet qilishqa toghra keldi.

Uchquch bolup, kökte perwaz qilish – Waqqas Abbasoghlining baliliq armini édi. Shu arman yétiligen bolushi kérek, herbiy borchini ötep kélip, Almutidiki grazhdanliq awiaцiyade radioméxanik bolup ishlidi. Aliy bilimlik mutexessis bolushni mexset qildi. Ishtin qol üzmey, Xeliq égiligi institutining Ixtisadiy réjilesh fakultétining kechki bölümide bilim aldi.

Jiddiy emgek paaliyitige kelsek, 1968-zhildin 1975-zhilghiche Qazaqstan Ministrlar Kéngishining Emgek résursliri komitétida jawapkerlik xizmet atqurdi. 1975-zhili Almuta shehiridiki «Tüskiiz» fabrikisi mudirining orunbasari bolup tayinlandi. Qazaqstandiki yénik sanaet tereqqiyatigha öz ülüshini qoshqan namayende Tursun Paltashéw mezkür fabrikining mudiri édi. Neq moshu tejribilik rehber Waqqas akining kelgüsige yollanma bergen ustazi bolup qaldi. 1977-zhili Mangghistaw wilayitining Shéwchénko (Hazirqi Aqtaw) shehiride yéngi ishlepchiqirish ornini qurush wezipisi yash mutexessiske zhüklendi. Barni yoqitish ongay, amma yoqtin berpa qilish nahayiti qiyin bolghanliqtin, yéngi fabrika échishqa kespiy maharet we gheyret kérek édi. Kesipke bolghan chin muhebbet bilen xizmette ösüshnila oylash – biri-biridin periqlinidighan nerse. Ishtiyaq bilen ishlengen emgekla ijabiy netijisini béridu. Mangghistaw wilayitidiki bu karxanini teshkillep, yolgha qoyush yolida alahide ixlas we shijaet bilen kiriship ketti.

Herqandaq xizmet öz ishigha jawapkerlik bilen qarashni telep qilidu. Jawapkerlik bar yerde közligen nishangha yetkili bolidu. Bu qaidini chüshengen maqalimiz qehrimani özi asasini salghan Aqtaw shehiridiki ishlepchiqirish ornigha (Gorpromkombinatning) yette zhil rehberlik qilidu. Fort-Shéwchénko, Éraliéw, Zhangaözén sheherliride kombinatning shöbilirini échip, mingdin köp ademni ish bilen teminleydu.

Waqqas Memedinow 1984-zhili Qazaqstan panglar jemiyitige qarashliq Almutidiki oqup-ishlepchiqirish karxanisining mudiri bolup tayinlinidu. Mümkinchiligi cheklengen ademler bilen ishleydighan rehberning ichki duniyasida alahide méhir-muhebbet bolushi kérek. Tughulushidin meyip janlarning béshini biriktürüp, ularning heq-hoquqliri bilen muddiasini qoghdap, paydiliq emgekke jelip qilish, ömürge dégen ishenchisini ashurush üchün köpligen ishlarni emelge ashurushqa toghra keldi.

Ixtisadiy bohran owj alghan ötken esirning 90-zhilliri bu ishlepchiqirish ornini hertürlük tosalghuluqlardin süründürmey élip chiqishning özi öz aldigha bir hékaye. Nakalighi bar janlarning ömri qiyinchiliqlargha tolghan bolsimu, köpchiligi «Salametligim yar bermeydu» dep qol qoshturup turmaydu. Belki tiriship-tirmiship adil emgek qilidu.  Eyne shundaq iradisi küchlük ademlerge Waqqas Abbasoghli rehber rétide emes, insan rétide qolidin kélidighan yardimini ayimidi. U muhtaj janlargha körsetken yardimi heqqide éytip ketmeydu. Bu ishni ademgerchilikning adettiki bir körünüshi dep qaraydu.

Qazaqstan Jumhuriyiti öz musteqilligini jakalighandin kéyin dewirning yéngi sehipiliri échildi. Jemiyetlik paaliyetlerge imkaniyetler yaritildi. Özi teshebbuskar bolghan jemiyetlik birleshme «Uyghurlarning milliy assoцiaцiyasining» wiцé-prézidénti süpitide milliy medeniyitimizning tereqqiyatigha öz ülüshini qoshti. Ediplirimizning kitapliri neshir qilindi, xeyrixahliq merasimlar, medeniy chare-tedbirler uyushturuldi. Waqqas Abbasoghlining küch-gheyriti bilen chet ellerde ötküzülgen merasimlarda xelqimizning medeniyitini namayish qilidighan körgezmiler, konцértliq programmilar körsitildi. Mesilen, duniyagha meshhur antropolog Andrash Bironing teshabbusi bilen Mazharstanda (Wéngriya) uyushturulghan hun-türkiyler qurultiyigha qazaqstanliq uyghurlar délégaцiyasining qatnishishi üchün köp küch chiqardi. «Sariarqa» korporaцiyasining prézidénti, merhum Qural Érzhanow bilen qazaq-uyghur xelqining dostlughini mustehkemlesh yolida biraz ishlarni emelge ashurdi. Ikki xeliqning ziyaliliri ishtrak qilghan «Ipek yolidiki dostluq» dep atilidighan «düglek üstel» neq shu emgekning éniq ipadisi.

Waqqas aka öz meblighi hésawigha birnechche neper qaraközlirimizning aliy bilim élishigha zemin yaratti. Ularning arisida nahiyelerdiki ixtisadiy sharaiti töwen aililerning perzentlirimu bar.

Waqqas Abbasoghli halal emgigi, xeyrixahlighi bilen elge tonulghan insan. Prézidéntimiz éytqandek, adil emgek qilip, adil tapawet tapqan adem muwappeqiyetke yétidu, hörmetke ége bolidu.